Երկարացված օրվա կազմակերպիչների մանկավարժական ճամբարում ստուգարքների հանձնման շրջան է : Երեկ տիար Բլեյանի, Արմինե Թոփչյանի եւ Միքայել Ղազարյանի ուղեկցությամբ հանձնեցինք հեծանվային ստուգատեսը, հեծանվաերթով գնացինք Փարաքարի Սբ. Հարություն եկեղեցի: Նախանձելի հեծանվաերթ էր սիրելի մարդկանց հետ: Շնորհակալ եմ աննկարագրելի տպավորությունների եւ զգացողությունների համար:
Այսօր տեղի ունեցավ երկարացված օրվա կազմակերպիչների հեծանվի տեխնիկական սպասարկման սեմինար-պարապմունքը,որը վարեց մարզական ակումբի ղեկավար՝ Միքայել Ղազարյանը:
Կրթահամալիրի տնօրենի անդրադարձով ծանոթանալու եւ ուսումնասիրություններ անելու նպատակով՝ հունիսի 22-ին երկարացված օրվա կազմակերպիչների, դասավանդողների խմբով հեծանվային այց իրականացրեցինք «Սիրո ու հավատի» այգի: Բանգլադեշի Բ-2 թաղամասի «Սիրո ու հավատի» այգի կոչվող կանաչ ընդարձակ տարածքը չգիտես ինչու մատնված է անուշադրության բնակչության եւ հարակից՝ թիվ 11 հիմնական եւ 190 ավագ դպրոցների ուսուցչական եւ աշակերտական կազմի կողմից: Ցանկապատված ամայի տարածքներ, որոնք չգիտես էլ արդյո՞ք ծառայել են իրենց նպատակին կամ ժողովրդին: Փորձեցինք բնակիչներից պարզել, տեղեկություններ իմանալ այգու մասին, բայց ոչ ոք ստույգ չկարողացավ նշել, թե երբ է ստեղծվել այգին կամ ինչո՞ւ է այսօր գտնվում անմխիթար, անբարեկարգ վիճակում: Աշխատողներից պարզեցինք, որ արդեն կա ջրամատակարարում, բայց ցավոք աշխատողներ չկան, ովքեր կարող են հետեւել ոռոգման աշխատանքներին: Կարծում եմ այգին պետք է լինի բոլորիս ուշադրության կենտրոնում, այգին ունի բոլորիս աջակցության կարիքը:
Երկարացված օրվա կազմակերպիչների ճամբարում շարունակվում են ձիավարության սեմինար-պարապմունքները: Լուսինե Աբրահամյանի եւ Խորեն Հազարումյանի ջանքերի շնորհիվ ընդամենը մի քանի սեմինար-պարապմունքի ընթացքում սովորեցինք, ձեռք բերեցինք ձիերին խնամելու, ճիշտ սանձել, թամբելու կարողություններ:Այսօր փորձեցինք նաեւ ինքնուրույն ձիավարել եւ կարծում եմ շատերիս մոտ ստացվեց:
Այսօր երկարացված օրվա կազմակերպիչների ձիավարության ուսուցման հերթական սեմինար-պարապմուքն էր:Սեմինար-պարապմունքները սկսվում են ձիերի խնամքով, այնուհետև Խորեն Հազարումյանի եւ Լուսինե Աբրահամյանի օգնությամբ թամբում ու սանձում ենք, իսկ հետո սանձից բռնելով՝ փորձում ենք շրջապտույտ անել: Այսօրվա սեմինարի ժամանակ սովորեցինք ինքնուրույն սանձել եւ թամբել ծանրաքարշ Մաշա ձիուկին: Մի քանի սեմինար-պարապմունքներից հետո արդեն նկատելի է դրական փոփոխությունը՝ հիմա կարողանում ենք դիպչել, խնամել, փորձում ենք նաեւ թամբել եւ սանձել: Այնպիսի տպավորություն է, որ կարծես Մաշան արդեն ճանաչում է մեզ եւ կամակորություն չի անում:
Երկարացված օրվա կազմակերպիչների ճամբարում շարունակվում են լողուսուցման եւ ձիավարության սեմինար-պարապմունքները: Ձիավարության սեմինար-պարապմունքը սկսեցինք Մաշայի խնամքով: Բոլորով խնամեցինք Մաշային՝ սանրեցինք, մաքրեցինք: Հետո ընկեր Խորենն ու Լուսինեն սովորեցրեցին, թե ինչպես պետք է սանձենք եւ թամբենք ձիերին:Ինչպես անցած սեմինարին, այսօր նույնպես հեծնեցինք Մաշային եւ շրջապտույտ կատարեցինք:Այսօր շատերիս մոտ ավելի լավ ստացվեց պտտեցնել,քայլեցնել ձիուն՝ սանձից բռնելով,կառավարելով, կարողացանք նաեւ ճիշտ նստել ձի:
Այսօր տեղի ունեցավ երկարացված օրվա կազմակերպիչների ձիավարության ուսուցման հերթական սեմինար — պարապմունքը: Ամենահավես սեմինար պարապմունքներից, որն ունի իր հստակ նպատակը՝ սովորել եւ հետո արդեն սովորածը կիրառել ճամբարային երկարացված օրվա ջոկատներում: Խորեն Հազարումյանի և Լուսինե Աբրահամյանի շնորհիվ սովորում ենք ճիշտ խնամել ձիերին՝ սանրել, մաքրել, քայլեցնել, սանձը կապել, ճիշտ վարելու ձևերից մինչև նստելու, թամբելու, սանձելու հմտություններ: